ہر حال میں رہا جو ترا آسرا مجھے

غزل

ہر حال میں رہا جو ترا آسرا مجھے

مایوس کر سکا نہ ہجوم بلا مجھے

ہر نغمے نے انہیں کی طلب کا دیا پیام

ہر ساز نے انہیں کی سنائی صدا مجھے

ہر بات میں انہیں کی خوشی کا رہا خیال

ہر کام سے غرض ہے انہیں کی رضا مجھے

رہتا ہوں غرق ان کے تصور میں روز و شب

مستی کا پڑ گیا ہے کچھ ایسا مزا مجھے

رکھیے نہ مجھ پہ ترک محبت کی تہمتیں

جس کا خیال تک بھی نہیں ہے روا مجھے

کافی ہے ان کے پائے حنابستہ کا خیال

ہاتھ آئی خوب سوز جگر کی دوا مجھے

کیا کہتے ہو کہ اور لگا لو کسی سے دل

تم سا نظر بھی آئے کوئی دوسرا مجھے

بیگانۂ ادب کیے دیتی ہے کیا کروں

اس محو ناز کی نگۂ آشنا مجھے

اس بے نشاں کے ملنے کی حسرتؔ ہوئی امید

آب بقا سے بڑھ کے ہے زہر فنا مجھے

مولانا حسرت موہانی

Read More

یہ فخر تو حاصل ہے برے ہیں کہ بھلے ہیں

غزل

یہ فخر تو حاصل ہے برے ہیں کہ بھلے ہیں

دو چار قدم ہم بھی تیرے ساتھ چلے ہیں

جلنا تو خیر چراغوں کا مقدر ہے ازل سے

یہ دل کے کنول ہیں کہ بجھے ہیں نہ جلے ہیں

تھے کتنے ستارے کہ سرِ شام ہی ڈوبے

ہنگامِ سحر کتنے ہی خورشید ڈھلے ہیں

جو جھیل گئے ہنس کے کڑی دھوپ کے تیور

تاروں کی خنک چھاؤں میں وہ لوگ جلے ہیں

اک شمع بجھائی تو کئی اور جلا لیں

ہم گردشِ دوراں سے بڑی چال چلے ہیں

٭٭٭٭٭٭٭

ادا جعفری

Read More

لگتا نہیں ہے دل مرا اجڑے دیار میں

غزل

لگتا نہیں ہے دل مرا اجڑے دیار میں

کس کی بنی ہے عالم ناپائیدار میں

کہہ دو ان حسرتوں سے کہیں اور جا بسیں

اتنی جگہ کہاں ہے دل داغدار میں

کانٹوں کو مت نکال چمن سے او باغباں

یہ بھی گلوں کے ساتھ پلے ہیں بہار میں

بلبل کو باغباں سے نہ صیاد سے گلہ

قسمت میں قید لکھی تھی فصل بہار میں

کتنا ہے بد نصیب ظفرؔ دفن کے لیے

دو گز زمین بھی نہ ملی کوئے یار میں

Read More

میر دریا ہے سنے شعر زبانی اس کی

GHAZAL

میر دریا ہے سنے شعر زبانی اس کی

اللہ اللہ رے طبیعت کی روانی اس کی

خاطرِ بادیہ سے دیر میں جاوے گی کہیں

خاک مانند بگولے کے اڑانی اس کی

ایک ہے عہد میں اپنے وہ پراگندہ مزاج

اپنی آنکھوں میں نہ آیا کوئی ثانی اس کی

مینہ تو بوچھار کا دیکھا ہے برستے تم نے

اسی انداز سے تھی اشک فشانی اس کی

بات کی طرز کو دیکھو تو کوئی جادو تھا

پر ملی خاک میں کیا سحر بیانی اس کی

کر کے تعویذ رکھیں اس کو بہت بھاتی ہے

وہ نظر پاؤں پہ وہ بات دوانی اس کی

اس کا وہ عجز تمھارا یہ غرورِ خوبی

منتیں ان نے بہت کیں پہ نہ مانی اس کی

کچھ لکھا ہے تجھے ہر برگ پہ اے رشکِ بہار

رقعہ واریں ہیں یہ اوراق خزانی اس کی

سر گذشت اپنی کس اندوہ سے شب کہتا تھا

سو گئے تم نہ سنی آہ کہانی اس کی

مرثیے دل کے کئی کہہ کے دیے لوگوں کو

شہر دلّی میں ہے سب پاس نشانی اس کی

میان سے نکلی ہی پڑتی تھی تمھاری تلوار

کیا عوض چاہ کا تھا خصمیِ جانی اس کی

آبلے کی سی طرح ٹھیس لگی، پھوٹ بہے

درد مندی میں گئی ساری جوانی اس کی

اب گئے اس کے جز افسوس نہیں کچھ حاصل

حیف صد حیف کہ کچھ قدر نہ جانی اس کی

میر تقی میر

Read More

کوئی امّید بر نہیں آتی

غزل

کوئی امّید بر نہیں آتی
کوئی صورت نظر نہیں آتی
موت کا ایک دین معیّن ہے
نیند کیوں رات بھر نہیں آتی
آگے آتی تھی حالِ دل پہ ہنسی
اب کسی بات پر نہیں آتی
جانتا ہوں ثوابِ طاعت و زہد
پر طبیعت ادھر نہیں آتی
ہے کچھ ایسی ہی بات جو چپ ہوں
ورنہ کیا بات کر نہیں آتی
کیوں نہ چیخوں کہ یاد کرتے ہیں
میری آواز گر نہیں آتی
داغِ دل گر نظر نہیں آتا
بُو بھی، اے چارہ گر، نہیں آتی
ہم وہاں ہیں جہاں سے، ہم کو بھی
کچھ ہماری خبر نہیں آتی
مرتے ہیں آرزو میں مرنے کی
موت آتی ہے پر نہیں آتی
کعبہ کس منہ سے جاؤ گے غالبؔ
شرم تم کو مگر نہیں آتی

(مرزا اسد اللہ خان غالبؔ)

Read More

دلِ نادان، کھلونے میں دلا دوں گا تُجھے

غزل

دلِ نادان، کھلونے میں دلا دوں گا تُجھے
خواب بُنتا ہوں جو دن رات، وہ لا دوں گا تُجھے

جاگ اُٹھتی ہے تُو ہر روز قیامت کیا ہے
خواہش وصل میں فرقت سے بُجھا دوں گا تُجھے

حسرت شوق، یہ مہنگا ہے ترا اُٹھ جانا
ایک تدبیر ہے تھپکوں گا سُلا دوں گا تُجھے

اک دھنویں سے تو زیادہ تری اوقات نہیں
غم نہیں تیرا مجھے غم، میں اُڑا دوں گا تُجھے

میں ترے درد کا داماں تو نہیں بن سکتا
اک دعا ہی میرے بس میں ہے، دعا دوں گا تُجھے

ایک کشتی پہ ترا نام لکھوں گا اظہر
جب بھُلانا ہی ہو مقصود، بہا دوں گا تُجھے

Read More

دلِ ناداں تُجھے ہُوا کیا ہے

غزل

دلِ ناداں تُجھے ہُوا کیا ہے

آخر اِس درد کی دوا کیا ہے

ہم ہیں مُشتاق اور وہ بیزار

یا الہٰی یہ ماجرا کیا ہے

میں بھی منْہ میں زبان رکھتا ہوں

کاش پُوچھو، کہ مُدّعا کیا ہے

جب کہ تُجھ بِن نہیں کوئی موجُود

پھر یہ ہنگامہ، اے خُدا کیا ہے

یہ پری چہرہ لوگ کیسے ہیں

غمزہ وعشوہ و ادا کیا ہے

سبزہ و گُل کہاں سے آئے ہیں

ابْر کیا چیز ہے، ہَوا کیا ہے

ہم کو اُن سے وفا کی ہے اُمیّد

جو نہیں جانتے وفا کیا ہے

ہاں بَھلا کر تِرا بَھلا ہو گا

اور درویش کی صدا کیا ہے

جان تم پر نِثار کرتا ہوں

میں نہیں جانتا دُعا کیا ہے

میں نے مانا کہ کچُھ نہیں غالب

مُفت ہاتھ آئے تو بُرا کیا ہے

اسداللہ خاں غالب

Read More